ఊహా ప్రేయసి (భావ కవిత)

ఊహా ప్రేయసి!

వేడికోలిదే ప్రియురాలా. . . !
నా వేడికోలిదే ప్రియురాలా. . . !
ముకుళిత మానస అంతస్సమున
భావన ప్రతిమకు జీవనస్వామిగా
విరహపు త్వరలో
మధురిమ ఝరిలో. . . !

. . .వేడికోలిదే. . .

మెరుపు రూపముగ బంగరు తీవెవు
మేఘని చలువగ కరుణమూర్తిమవు
మెదుపు పలుకులన మృదులభాషిణవు
మాటువేళలన మైమరపున నను
విడిచిపోకుమని విస్మరింపకని. . . !

. . .వేడికోలిదే. . .

కుదుపుకు కదిలిన నలుపు వాలుజడ
ముగ్గులిడను నువు ముందుకు వాలగ
నేలకు వ్రేల్పడి ముగ్దనె దలపగ
తపము నెరుపుటకు జపపుమాలగా
జంకుమానుకుని జడను యివ్వుమని. . . !

. . .వేడికోలిదే. . .

నుదురున చెదిరిన సింధుర గుండ్రము
సంజె సమయమున సూరుని బింబము
చెమరిన చెక్కిలి అదిరిన పెదివము
ముక్కు ధిక్కరణం నేత్ర విస్ఫురణం
నిదురపోవగను నుదురు నివ్వుమని. . . !

. . .వేడికోలిదే. . .

కయ్యము సలిపెను పయ్యెద పొంగులు
నడువము కడువము నడమంతరము
కడుపు కండరము మడతలు పడగా
మడత వేడిమిన కన్నులె కాలగ
ముఖము దాచుకుని దుఃఖ పడెదనని. . . !

. . .వేడికోలిదే. . .

చెంగున గెంతగ కొంగు జార్చుకుని
పరికిణి పట్టుకు పరుగులు తీయగ
కాలి అందియలు ప్రిదిలి ఘల్లుమన
ముముక్షువునయినే మోక్షము నొందను
వేదము బదులుగ పాదములిమ్మని. . . !

. . .వేడికోలిదే. . .